باختصار وبالعامية وبالأمثلة! .. ( تلخيص وتبسيط أحكام سجود السهو ) ..!!

بصوا بقى يا حبايبي
في مشكلة كبيرة عند اغلبنا
ان الناس فاهمة ان سجود السهو ده سجدتين كده بعد السلام وخلاص!!
ايا كان بقى اللي حصل
نسيتي ركن
نسيتي واجب
زودتي ركعة
نقصتي ركعة
شكيتي انتي زودتي ولا نقصتي!
مش فارقة!!

وطبعا ده غلط جدا
هما فعلا سجدتين لكن
له تفصيل وكل حالة ليها حاجة

ولكن شرحه عايز تركيز شوية
وجت الفرصة ان فتوكة هنا سألت عن احكام سجود السهو
فاختصرتها لها وبسطتها لها في الشرح
وقلت احطها في موضوع منفصل عشان الكل يستفيد ان شاء الله .

،،،،،،،،،،،،،،،

نبتدي بقى بالراحة
بسم الله،

- تم الرجوع لتفصيل وشرح الشيخ ابن عثيمين -رحمه الله - لسجود السهو-

سجود السهو عبارة عن سجدتين بيتصلوا لجبر خلل او نقص حصل في الصلاة

سجود السهو له 3 أسباب ممكن تحصل أثناء الصلاة:
1- الزيادة
2- النقص
3- الشك

هناخد واحد واحد فيهم نتكلم عليه ونقول امتى بيكون سجود السهو قبل السلام وامتى بعد السلام

1- الزيادة:
------
لها حالتين:
* إذا زودتي في الصلاة قيام او قعود او سجود او ركوع:
----- لو ما افتكرتيش الا بعد ما سجدتي مثلا السجود الزيادة ده وخلصتيه؛ ما عليكيش الا انك هتسجدي سجود سهو بعد السلام .
----- طيب لو افتكرتي وانتي بتسجدي ؛ ترجعي عنه وتكملي صلاتك عادي وتسجدي سجود سهو بعد السلام .

الحالة التانية في الزيادة:
* اذا سلمتي قبل اتمام صلاتك (ويعد هنا السلام قبل اتمام الصلاة من الزيادة في الصلاة):
----- لو افتكرتي خلال وقت قليل بعد انتهائك من الصلاة "مثلادقيقتين او تلاتة" ؛ هتكملي اللي باقي من صلاتك وتسجدي للسهو بعد السلام.
(* مثال: لو صليتي الضهر اتنين وسلمتي وبعد دقيقتين مثلا افتكرتي، هتروحي مكملة وتصلي اتنين تكملي بيهم الصلاة وتسلمي وبعدين سجود سهو،
لو ما افتكرتيش في وقت قليل ؛ هتصلي الضهر كله اربعة تاني -ودي الحالة اللي لسه هكتبها-)
----- لو ما افتكرتيش الا بعد وقت طويل؛ هتعيدي الصلاة كلها من اول وجديد .

كده خلصنا حالة الزيادة ..الزيادة كله بنسجد سجود السهو بعد السلام
ندخل في حالة الشك الاول لان حالةالنقص طويلة شوية .

3- الشك:
------
وهو انك تترددي انتي صليتي اد ايه او في انهي ركعة بالضبط
وده لا يخلو من حالتين:
- إما انك يترجح عندك احد الامرين مثلا انك في الركعة التانية ولا التالتة ؛ فيترجح عندك اكتر انك في التالتة ...
فهنا هتاخدي باللي ترجح لك وتكملي على اساس انك في التالتة ،
وتسجدي للسهو بعد السلام .

- إما إنك ما يترجحش عندك حاجة من الاتنين وتبقي متلخبطة فعلا مش عارفة ترجحي انتي دلوقتي في الركعة التانية ولا التالتة ...
فهنا هتعملي باليقين وهو الأقل ... يعني هتبقي كإنك في الركعة التانية وتكملي على اساسها ،
وتسجدي للسهو قبل السلام .

بس كده دي حالة الشك ، نيجي لحالة النقص بقى ..

2- النقص:
-------
تنقسم إلى حالتين ... حالة نقص الأركان ، او نقص الواجبات
طيب .. لازم نعرف الاول ايه هي الاركان وايه هي الواجبات عشان نعرف نحدد ..
تمام؟

أركان الصلاة هي:
- القيام مع القدرة.
- تكبيرة الإحرام.
- قراءة الفاتحة مع كل ركعة .
- الركوع .
- الرفع من الركوع .
- السجود على الاعضاء السبعة .
- الاعتدال من السجود .
- السجود بين السجدتين .
- الطمأنينة في جميع الأركان .
- التشهد الأخير والجلوس له .
- الصلاة على النبي -عليه الصلاة والسلام- .
- التسليم .
- الترتيب .

واجبات الصلاة هي:
- جميع التكبيرات غير تكبيرة الاحرام .
- قول "سمع الله لمن حمده" .
- قول "ربنا ولك الحمد" .
- قول " رب اغفر لي " بين السجدتين .
- قول " سبحان ربي العظيم" في الركوع .
- قول "سبحان ربي الأعلى" في السجود .
- التشهد الأول .

تمام كده ؟

طيب ندخل بقى في حالة:

* نقص الأركان:
لو كانت تكبيرة الاحرام ؛ فلا صلاة لك سواء ناسية او متعمدة لان صلاتك كده لم تنعقد اصلا!

لو كانت حاجة غيرها هنفصّل بقى:
لو انتي في الركعة التانية دلوقتي ، واكتشفتي انك نسيتي ركن في الركعة الاولى
فخلاص كده تتلغي الركعة الاولى كإنك ما صلتيهاش وتبتدي في التانية كإنها الاولى وتكملي الباقي
وتسجدي للسهو بعد السلام .

لو انتي في الركعة الاولى لسه وافتكرتي انك نسيتي ركن هترجعيله وتعمليه وتكملي اللي بعديه وتكملي بقية صلاتك ،
وتسجدي للسهو بعد السلام برضو .

كده خلصنا حالة نقص الأركان ،
ندخل في حالة:

* نقص الواجبات :
هنفصّل برضو بمثال..
حالة (1)
لو انتي دلوقتي رفعتي من السجود الثاني في الركعة الثانية
وجيتي تقومي عشان تبتدي الركعة التالتة ونسيتي التشهد الاول
افتكرتي قبل ما تقومي انك ما قلتيش التشهد؟:
هتقعدي وتقوليه
ومفيش كده سجود سهو عليكي.

حالة (2)
طيب لو افتكرتي بعد ما جيتي تقفي بس ماكنتيش لسه وقفتي ؟
هترجعي مكانك تاني وتقوليه وتكملي صلاتك
وتسجدي للسهو بعد السلام

حالة (3)
طيب لو افتكرتي بعد ما كنتي وقفتي فعلا خلاص؟
خلاص كده سقط عنك التشهد ما ترجعيلوش
وهتكملي صلاتك عادي
وتسجدي للسهو قبل السلام .

بس كده خلصنا !

وللتلخيص والتسهيل.. فــ:
سجود السهو قبل السلام يكون في حالتين:
1- النقص .
2- شك لم يترجح فيه أحد الأمرين .

ويكون سجود السهو بعد السلام في حالتين:
1- الزيادة .
2- شك ترجّح فيه أحد الأمرين .
,,,,,,,,,,,,,,,

معلش انا عارفة طبعا طويل وتفصيلات دقيقة محتاجة تركيز
بس مع الوقت هتحفظيهم ان شاء الله وهيبقوا سهلين

ان شاء الله يكونوا وصلوا لك بشكل مبسط ومختصر
ولو في اي استفسارات في حاجة مش فاهماها انا تحت امرك .

----

» 60 سؤالا في أحكام الحيض والنفاس
» أحكام لباس المرأة المسلمة وزينتها